កូរ៉េខាងត្បូង៖ រដ្ឋាភិបាលកូរ៉េខាងត្បូង បានចាប់ផ្តើមនូវយុទ្ធនាការផ្តល់វ៉ាក់សាំងទៅឱ្យប្រជាពលរដ្ឋវ័យចាស់ ចាប់ពី ៥៥ឆ្នាំទៅដល់ ៥៩ឆ្នាំ នៅថ្ងៃចន្ទ ទី២៦ ខែកក្កដានេះ ដែលជាផ្នែកមួយនៃការបង្កើនល្បឿននៃយុទ្ធនាការផ្តល់វ៉ាក់សាំងជូនប្រជាជនទូទាំងប្រទេស ក៏ដូចជាការបង្កើនភាពស៊ាំក្នុងសហគមន៍ ស្របពេលដែលកូរ៉េកំពុងប្រឈមមុខអំពីការឆ្លងរលកទី៤ នៃវីរុសកូវីដ-១៩។

កាលពីសប្តា្តហ៍មុន ប្រជាជនប្រមាណ ៦,១៧លាននាក់ ឬស្មើនឹងជាង ៨៤ភាគរយនៃប្រជាជនមានអាយុលើសពី ៥០ឆ្នាំ បានស្ម័គ្រចិត្តចុះឈ្មោះដើម្បីបានទទួលវ៉ាក់សាំងបង្ការកូវីដ-១៩។ ក្នុងនោះផងដែរ រដ្ឋាភិបាលកូរ៉េបានបញ្ជាក់ពីការប្តូរប្រភេទវ៉ាក់សាំងសម្រាប់ចាក់ឱ្យប្រជាជនខ្លួន ពោលគឺប្រជាជនមួយចំនួននឹងត្រូវបានទទួលវ៉ាក់សាំងប្រភេទ Pfizer BioNTech ជំនួសឱ្យការផ្តល់វ៉ាក់សាំងប្រភេទ Moderna ដោយសារបញ្ហាយឺតយ៉ាវនៃការដឹកជញ្ជូន ដែលកត្តានេះរដ្ឋាភិបាលក៏ទទួលបានការរិះគន់មិនស្ទើរដែរពីប្រជាជនរបស់ខ្លួន។

រដ្ឋាភិបាលកូរ៉េកំពុងបង្កើនល្បឿននៃការផ្តល់វ៉ាក់សាំងដល់ប្រជាជនរបស់ខ្លួនឱ្យបានឆាប់រហ័ស ជាពិសេសទៅលើក្រុមប្រឈមជួរមុខ ពោលគឺប្រជាជនប្រមាណ ៣៣ភាគរយ បានទទួលវ៉ាក់សាំងចំនួន ១ដូស ខណៈ ១៣ភាគរយ បានទទួលវ៉ាក់សាំងពេញ ២ដូសរួចរាល់ ក្នុងចំណោមប្រជាជនគោលដៅចំនួន ៥២លាននាក់។

គួរឱ្យដឹងផងដែរថា អាជ្ញាធរផ្នែកត្រួតពិនិត្យ និងបង្ការការឆ្លងរាលដាលជំងឺរាតត្បាតរបស់កូរ៉េខាងត្បូង បានរាយការណ៍អំពីករណីឆ្លងកូវីដ-១៩ ថ្មីចំនួន ១,៣១៨ករណីកាលពីថ្ងៃអាទិត្យម្សិលមិញនេះ ដែលនាំឱ្យចំនួនអ្នកឆ្លងសរុបនៃប្រទេសកូរ៉េខាងត្បង កើនឡើងដល់ ១៩០,១៦៦នាក់ និងមានអ្នកស្លាប់ចំនួន ២,០៧៧នាក់៕